ភ្នំពេញ៖ អនុប្រធានមន្ទីរប្រឆាំងបទល្មើសគ្រឿងញៀនម្នាក់ និងបក្ខពួក លើករណីជំរិតយកប្រាក់ពីជនជាតិចិនដែលពាក់ព័ន្ធគ្រឿងញៀន ដោយយកប្រាក់រាប់ម៉ឺនដុល្លារជាថ្នូរនឹងការដោះលែង ត្រូវបានឃាត់ខ្លួន ខណៈតុលាការចោទប្រកាន់ពីបទ ចាប់ និងបង្ខាំងដោយខុសច្បាប់មានស្ថានទម្ងន់ទោស ជំរិតយកប្រាក់។

អ្នកនាំពាក្យនៃអយ្យការអមសាលាដំបូងរាជធានីភ្នំពេញ បានឱ្យដឹងថា ជនសង្ស័យចំនួន ៥នាក់ ដែលត្រូវបានសង្ស័យថា បានប្រព្រឹត្តសកម្មភាពដេញចាប់ជនរងគ្រោះនៅតាមផ្លូវសាធារណៈ យកទៅបង្ខាំងដើម្បីទទួលបានផលប្រយោជន៍ពីជន រងគ្រោះជាថ្នូរនឹងការដោះលែងឲ្យមានសេរីភាព។

អយ្យការអមសាលាដំបូងរាជធានីភ្នំពេញឱ្យដឹងទៀតថា ក្រុមជនសង្ស័យត្រូវបានឃាត់ខ្លួន និងបញ្ជូនមក កាន់អយ្យការអមសាលាដំបូងរាជធានីភ្នំពេញ បន្ទាប់ពីមានពាក្យបណ្ដឹងរបស់ជនរងគ្រោះ ដើម្បីចាត់ការតាមនីតិវិធីច្បាប់។

ទន្ទឹមនេះ អ្នកនាំពាក្យតំណាងអយ្យការអមសាលាដំបូងរាជធានីភ្នំពេញបញ្ជាក់ថា ផ្អែកតាមលទ្ធផលនៃការស៊ើបអង្កេតខាងលើ តំណាងអយ្យការអមសាលាដំបូងរាជធានីភ្នំពេញ បានសម្រេចបើកការស៊ើបសួរតាមរយៈដីកាសន្និដ្ឋានបញ្ចូនរឿងឲ្យស៊ើបសួរ ដោយស្នើសុំចៅក្រមស៊ើបសួរដាក់ឲ្យស្ថិតនៅក្រោមការពិនិត្យលើមនុស្សចំនួន៧នាក់ មានឈ្មោះ ១. វ៉ាន់ កុសល ២. ជួន លឹមហេង ៣. អ្នក សំអូន ៤. នេត សុខុម ៥. ឈាវ ស៉ីដេត ដែលអ្នកទាំង៥ត្រូវបានឃាត់ខ្លួន រីឯមនុស្ស២នាក់ទៀតកំពុងគេចខ្លួន និងស្វែងរកមានឈ្មោះ ១. កែវ ខេន និង២. គង់ វីរៈជាតិ និងបក្ខពួក ដោយចោទប្រកាន់ពីបទ ចាប់ និងបង្ខាំងដោយខុសច្បាប់មានស្ថានទម្ងន់ទោស ឬហៅថា ជំរិតយកប្រាក់ ប្រព្រឹត្តនៅរាជធានីភ្នំពេញ កាលពីថ្ងៃទី១៦ ខែតុលា ឆ្នាំ២០២៣ បទល្មើសមានបញ្ញត្តិឲ្យផ្តន្ទាទោសតាមមាត្រា ២៥៤ កថាខណ្ឌទី១ ចំណុច៣ នៃក្រមព្រហ្មទណ្ឌ៕